Tbilisi-Ağdam marşrut avtobusunun partladılması (1990)
Tbilisi-Ağdam marşrut avtobusunun partladılması — 10 avqust 1990-cı il tarixdə "Tbilisi-Ağdam" marşrutu ilə hərəkət edən sərnişin avtobusunun partladılması.
Partlayıcı qurğu Azərbaycanın ikinci böyük şəhəri olan Gəncədən 12,5 km aralıda avtobusda partladılmışdır.
== İtkilər ==
60 sərnişini olan avtobus Gürcüstanın paytaxtı Tbilisidən Azərbaycanın Ağdam şəhərinə doğru hərəkət edirdi. Hadisə nəticəsində ölənlərin sayı müxtəlif mənbələrə görə 15-dən 20-yə qədər dəyişir. Müxtəlif dərəcədə yaralananların sayı isə 16-dan 30-a qədərdir.
== Cinayətkarlar ==
Partlayışın iddia olunan icraçıları iki etnik erməni olub. Azərbaycan, onların, mövcud olub-olmaması bilinməyən Vrezh adlı militant təşkilatın üzvləri olduğunu iddia etmişdir. Bu təşkilatın ilk fəaliyyəti 16 sentyabr 1989-cu ildə Tbilisi-Bakı avtobusunun partladılması olmuş və nəticədə 5 mülki şəxs həlak olmuş, 27 nəfər yaralanmışdır.
Həmin iki şəxs Armen Mixayloviç Avanesyan və Mixayl Mixayloviç Tatevosov (Tatevosyan) idi. Azərbaycan təhlükəsizlik qüvvələri onların 17 iyun 1991-ci ildə Ağdam–Tbilisi marşrutu üzrə planlaşdırılan növbəti hücumunu həyata keçirmədən əvvəl həbs edildiklərini iddia etmişdir.
