Sergey Kramarenko
Sergey Sergeyeviç Kramarenko (27 may 1946, Gəncə, Azərbaycan SSR — 25 mart 2008, Moskva, Rusiya) — sovet futbolçusu, SSRİ İdman Ustası (1966). Futbolçu karyerasında qapıçı mövqeyində çıxış etmişdir.
== Bioqrafiya ==
Sergey Kramarenko futbol oynamağa anadan olduğu Gəncə şəhərində başlayıb. Karyerasının çox hissəsini Bakının "Neftçi" klubunda keçirib. 1966-cı ildə "Neftçi" ilə SSRİ çempionatının bürünc mükafatını qazanıb. 1971-ci ildə hakimi vurduğu üçün 3 il futboldan diskvalifikasiya edildi, lakin 1973-cü ildə yenidən birinci liqada "Neftçi"də çıxış etməyə başlayıb.
Kramarenko SSRİ çempionatının yüksək liqasında oyun sayı baxımından Azərbaycan futbolunda rekordunu əlində saxlayır — 313 qarşılaşma (ləğv edilmiş bir matç da daxil olmaqla).
Karyerasını bitirəndən sonra məşqçilik etməyə başlayıb. Kramarenko "Göyəzən", "Xəzər Lənkəran", "Neftçi" klublarında çalışıb.
25 mart 2008-ci ildə Moskvada vəfat edib.