Valentina Tatarova
Valentina Kirilllovna Tatarova (Xakasca: Валентина Кирилловна Татарова, 15 iyun 1952, Arşanovo ulusu, Altay rayonu, Xakasiya ) – xakas şairəsi, yazıçısı və publisisti, Rusiya Yazıçılar Birliyinin üzvü, Xakasiya Respublikası Əməkdar Mədəniyyət işçisi.
== Bioqrafiyası ==
Valentina Tatarova 15 iyun 1952-ci ildə Xakasiya Respublikasının Altay rayonunun Arşanovo ulusunda anadan olmuşdur.
Orta təhsilini doğulduğu kənddə almış, daha sonra Abakan Pedaqoji İnstitutunun filologiya fakültəsini bitirmişdir. Təhsilini bitirdikdən sonra bir müddət orta məktəbdə müəllim, daha sonra jurnalist və tədqiqat-metodiki mərkəzdə elmi işçi, Xakasiya Yazıçılar Birliyinin sədr müavini vəzifələrində çalışmışdır.
Valentina Tatarova Rusiya Yazıçılar Birliyinin üzvü, Xakasiya Respublikasının Əməkdar Mədəniyyət işçisi, Moisey Bainov adına Xakasiya Respublikası ədəbi mükafatı lauretaıdır.
Hazırda Abakan şəhərində yaşayır.
== Yaradıcılığı ==
Valentina Tatarova bədii yaradıcılığa orta məktəbdə oxuduğu illərdə şeirlə başlamışdır. O, "Gənc səslər" ədəbi birliyinin fəal üzvü olmuş, ilk əsərlərini də burada səsləndirmişdir. Onun ilk şeiri 1974-cü ildə "Bahar yarpaqları" adlı almanaxda dərc olunmuşdur. Lakin Valentina Tatarova özünün ədəbiyyat aləmində ilk uğurunu məşhur xakas yazıçısı Nikolay Domojakovun "Uzaq aulda" romanının motivləri əsasında məktəb səhnəsində tamaşaya qoyulmaq üçün ssenari yazması hesab edir.